Velkommen til opning av Melting Ice – ei kunstutstilling, filmvisning og live performance laurdag 21 februar, klokka 16:00.

Vinterutstillinga til Bømlo Kunstlag er basert på eit tverrkunstnarleg og multimedialt prosjekt «Melting Ice», initiert av kunstnar og prosjektleiar Janne Robberstad. Saman med fleire andre inviterte kunstnarar har ho sidan våren 2025 jobba med eit undersøkjande, tverrkunstnarleg kunstfilmprosjekt knytt til klimaendringar og mennesket sin relasjon til naturen. Prosjektet munnar ut i ein kunstfilm, ei utstilling med lydverk og bilete og ein konsert-performance på opninga.

Hausten 2025 reiser ein lydkunstnar, to dansarar, to filmskaparar og ein biletkunstnar opp til Nigardsbreen. Målet er å utforska kunstnarleg korleis eit møte med ein bre, bresmelting og klimaendringar kan formidlast kroppsleg og kunstnarleg. Kan ein lytta til ein bre? Global oppvarming og klimaendringar er ofte knytt til store, abstrakte årsakssamanhengar som kan gjera oss motlause og forvirra. Vår intensjon med kunstprosjektet var i staden å minna om den ibuande sameksistensen mellom oss menneske det som skjer med naturen rundt. Resultatet vart ei kunstutstilling som innheld både videoverket «Melting Ice», lydkunst, installasjon og biletkunst.

OPNING AV MELTING ICE LAURDAG 21. FEBRUAR 16:00
På opninga er publikum invitert til ein open konsert-performance i blackboxen i Kulturhuset, med dansekunstnar, Margrete Slettebø og musikar/lydkunstnar Christer Fredriksen. Kva skjer om ein går reseptivt i møte med oss sjølv og naturen rundt? Kan vi forstå oss sjølv som natur, -saman med natur? Kan natur forståast sanseleg?

KUNSTNARSAMTALE
Etter utstillingsopning vert det kunstnarsamtale med dei tre kunstnarane i kulturhuskaféen.
Samtalen vert leia av Arild Kalkvik. 
I samband med kunstnarsamtalen kan du kjøpe småmat og noko godt å drikke i kulturhuskaféen.

Deltakande kunstnarar:

Janne Robberstad (Bømlo/Karmøy) har arbeidd som biletkunstnar i over 30 år, og har levert utsmykking til nybygg både til lands og til vanns. Dei siste ti åra har ho arbeid tverrfagleg med kunstfagsfeltet og naturfagsfeltet innan bærekraft, kreativitet i undervisning. Dette har mellom anna styrka interessa for å uttrykke uro og håp knytt til den nye klima-realiteten gjennom kunsten.

Christer Fredriksen (Kristiansand) er gitarist og komponist med ein kunstnarleg praksis forankra i lyd som materiale og uttrykk. Arbeidet hans dei siste åra beveger seg mellom jazz, ambient og eksperimentelle tradisjonar. 

Margrete Slettebø (Bømlo) er dansekunstnar med bakgrunn frå den japanske samtidsdansen, butoh. Ho er utdanna samfunnsvitar og har i mange år kombinert dette med ein kunstnarleg praksis. Arbeidet hennar har nærvær, medvit og kroppsleggjering som omdreiningspunkt.

______________________________

Utstillinga kan du oppleva i kjellaren på kulturhuset frå 21. februar til 3. mars. 
måndag til torsdag: 10:00 - 18:00 
fredag: 10:00 - 15:00 
laurdag: 10:00 - 14:00